Geoservetschs èn servetschs d'internet che concernan il territori e che rendan accessiblas geodatas en furma structurada. Grazia a geoservetschs pon infurmaziuns geograficas vegnir colliadas sur l'internet e datas pon vegnir visualisadas u barattadas.

Geoservetschs èn applicaziuns colliablas che simplifitgeschan l'utilisaziun da servetschs electronics en il sectur da las geodatas e che rendan accessiblas las geodatas en ina furma structurada." (LGeo art. 3 al. j).

La lescha po pretender da l'administraziun publica tranter auter da metter a disposiziun geodatas via servetschs d'internet. Tenor la OGeo art. 2 al. h fin k vegnan geoservetschs definids sco suonda:

Servetsch da retschertga: servetsch d'internet, cun il qual i pon vegnir tschertgads geoservetschs e – sin basa da las geometadatas correspundentas – unitads da geodatas;

• Servetsch da preschentaziun: servetsch d'internet, cun il qual unitads da geodatas represchentablas pon vegnir mussadas, engrondidas, empitschnidas e dischlocadas, cun il qual datas pon vegnir surpostadas e cun il qual ils cuntegns da geometadatas ch'èn relevants per las datas pon vegnir mussads ed il qual pussibilitescha da navigar entaifer las geodatas.
• Servetsch da download: servetsch d'internet che pussibilitescha da chargiar giu copias d'unitads cumplettas da geodatas u da parts da talas e che pussibilitescha, sche quai po vegnir fatg, in access direct a talas;
• Servetsch da transfurmaziun: servetsch d'internet per transfurmar unitads da geodatas.