Incarica da prestaziun: coordinaziun, installaziun e manaschi

L'uffizi federal da topografia ha l'incarica da garantir la coordinaziun, l'installaziun ed il manaschi da l'infrastructura federala da geodatas IFGD. L'incarica per quai dat l'organ federal da coordinaziun per la geoinfurmaziun (GCS).

 

Ina infrastructura da geodatas pussibilitescha a las utilisadras ed als utilisaders in access direct a las geoinfurmaziuns ed als geoservetschs da differents purschiders. En quest connex sa tracti d'in sistem da mesiras (politicas), d'indrizs instituziunals, da tecnologias, da datas e da persunas. Il sistem pussibilitescha ad utilisadras ed ad utilisaders da barattar e da duvrar en moda effizienta infurmaziuns geograficas.

Infrastructuras da geodatas datti sin differents plauns. Er vischnancas, citads e chantuns pon installar tals sistems.

 

Lescha federala davart la geoinfurmaziun (LGeo)

 

La lescha federala davart la geoinfurmaziun (LGeo) è entrada en vigur il 1. da fanadur 2008. Ella è la basa legala per tut las activitads dal dretg federal en il sectur da l'infurmaziun, dal barat e da l'utilisaziun da geodatas da basa. "L'intent da questa lescha è quel che geodatas dal territori da la confederaziun svizra stattan a disposiziun a las autoritads da la confederaziun, dals chantuns e da las vischnancas sco er a l'economia, a la societad ed a la scienza per ina vasta utilisaziun, e quai en moda durabla, actuala, svelta, simpla, en la qualitad necessaria ed a custs raschunaivels." (LGeo art. 1) 

Las datas da fotografias or da l'aria, da chartas, da plans sco er d'ulteriuras datas che concernan il territori vegnan a star a disposiziun en ina buna qualitad e per in pretsch raschunaivel – en furma stampada, en l'internet u sin apparats mobils. Prendids en mira vegnan standards unitars, tant tar la registraziun sco er per modellar e per archivar las datas e las metadatas. 

Envers ils servetsch federal ha l'organ da coordinaziun GCS il dretg da relaschar directivas (OGeo art. 48 al. 3). El ha las suandantas incumbensas (OGeo art. 48 al. 2):

  •  coordinar las activitads da l'administraziun federala;
  • sviluppar strategias da la confederaziun;
  • cooperar tar il svilup da normas tecnicas;
  • manar in center da cumpetenzas;
  • cussegliar posts chantunals.

 

Sistems d'infurmaziun da geodatas da la Svizra e da l'Europa

  • L'infrastructura federala da geodatas IFGD pertutga las geoinfurmaziuns da l'administraziun federala (geo.admin.ch).
  • L'infrastructura naziunala da geodatas INGD resguarda tant las organisaziuns publicas sco er privatas.
  • Cun INSPIRE stattan a disposiziun ils sistems correspundents sin plaun europeic.
  • Sin plaun chantunal e communal stattan er a disposiziun infrastructuras da geodatas.

 

 



geo.admin.ch c/o
Uffizi federal da topografia
COGIS (coordinaziun, geoinfurmaziun e servetschs)
Seftigenstrasse 264
CH - 3084 Wabern
Tel.
0041 58 469 03 15
Fax
0041 58 469 04 59

E-Mail


Stampar il contact

geo.admin.ch

c/o
Uffizi federal da topografia
COGIS (coordinaziun, geoinfurmaziun e servetschs)
Seftigenstrasse 264
CH - 3084 Wabern

Guardar la charta