geo.admin.ch è la plattafurma per infurmaziuns, datas e servetschs geolocalisads da l'administraziun federala. Quellas e quels vegnan mess a disposiziun d'instituziuns publicas e rendidas accessiblas a tuttas ed a tuts sur l'internet sin geo.admin.ch.
geo.admin.ch è er la realisaziun concreta da la lescha federala davart la geoinfurmaziun LGeo. Questa realisaziun pussibilitescha da barattar e da duvrar en moda effizienta infurmaziuns geograficas. La basa per quai è l'infrastructura federala da geodatas IFGD.
geo.admin.ch ademplescha ina funcziun dubla areguard l'incarica d'infurmaziun tenor la lescha da geoinfurmaziun:
- Il portal è in pass impurtant e necessari en la realisaziun da la LGeo. Las geodatas da basa èn accessiblas en l'internet en ina moda cumplessiva, svelta e cun cleras structuras.
- En quest portal vegnan infurmaziuns impurtantas tar las geodatas da basa da la confederaziun avertas en in lieu ed èn accessiblas sur in'adressa. geo.admin.ch è la plattafurma d'infurmaziun da tut ils uffizis federals, sch'i sa tracta da dumondas da geodatas da basa.
Tenor il suandant urari vegn questa plattafurma cumplettada permanentamain cun unitads da geodatas e cun funcziuns:
- tschertga, catalog e visualisaziun da geodatas, links tar geoportals e geoservetschs tematics da l'administraziun federala
- extensiun ad in portal federal da furniziun per geodatas e per servetschs
La coordinaziun da la geoinfurmaziun entaifer l'administraziun federala, inclusiv geo.admin.ch, stat sut la direcziun strategica da l'organ federal da coordinaziun per la geoinfurmaziun GCS.
