Sco utilisadra u sco utilisader pudais Vus fixar numerus parameters da questa charta – per exempel la zona mussada e la grondezza dal maletg sco er il tip da las infurmaziuns preschentadas u il funs da la charta.
L'applicaziun na permetta betg mo da preschentar la charta sin il monitur, mabain er da la stampar sin palpiri en ina buna qualitad. Tut tenor la regulaziun da las preferenzas pussibilitescha ella l'access ad infurmaziuns supplementaras ch'èn colliadas cun ils objects geografics.
Agid per la charta: funcziuns ed applicaziuns praticas
La charta da geo.admin.ch è in'applicaziun intuitiva per tschertgar, per preschentar e per duvrar infurmaziuns da gener geografic. Ella pussibilitescha ina preschentaziun interactiva da chartas e da datas spezialas che vegnan mussadas cun agid d'in program d'internet da standard (web-browser).
CONCEPZIUN DA LA FANESTRA DA LA CHARTA
Midar la lingua da l'applicaziun
- L'applicaziun percorscha la lingua preferida dal program d'internet. Sch'ina da las linguas da default n'As plascha betg per x-in motiv, la pudais Vus midar cun cliccar sin ils links sisum a dretga.
Grondezza da la charta
- Cun il menu "Vollbild" pudais Vus midar la grondezza da la charta uschia ch'ella dovra tut il monitur. Las funcziuns "Auswahl", "Suche" e "Katalog" vegnan alura zuppadas.
Mussar las coordinatas
- Las coordinatas da la posiziun dal cursor en il sistem da coordinatas naziunalas vegnan mussadas directamain sut la charta principala.
NAVIGAZIUN & ORIENTAZIUN
Zoom-in e zoom-out (midar la scala da la charta)
- Quest utensil permetta da midar la scala da la charta. La scala po vegnir midada entaifer ils stgalims che vegnan permess dal menu da reglader. Mintga clic sin l'utensil fa che la scala s'engrondescha u s'empitschnescha. In zoom-in po er vegnir fatg cun cliccar cun la mieur sin la posiziun giavischada da la charta.
Zoom sin ina zona
- Il zoom sin in rectangul / sin ina zona vegn activà cun smatgar la tasta SHIFT, cun cliccar il medem mument sin la charta e cun avrir in rectangul tirond la mieur, nua che la tasta sanestra resta smatgada, davent da la posiziun dal cursor. Sch'ins lascha ir la mieur, vegn engrondì quel rectangul ch'ins ha tschernì uschia.
Paliets da direcziun
- Cun ils paliets da direcziun pon ins spustar la zona da la charta en ina zona cunfinanta. Suenter l'actualisaziun resta visibla anc ina pitschna part (10%) da la charta veglia.
Utensil da spustament (panning)
- L'utensil da spustament po vegnir applitgà en duas modas: panning: cliccar sin la charta e tegnair cliccà per spustar la charta; centrar da nov: cliccar sin in punct per centrar la charta da nov sin quest punct.
Charta da navigaziun (survista)
- Questa charta chattais Vus giusum a dretga. Ella sto vegnir averta. Ella mussa ina survista generala da la Svizra. Tut tenor la scala mussa in rectangul u ina crusch cotschna la zona che vegn mussada da la charta principala. Questa charta è colliada en moda dinamica cun la charta principala. Sche Vus cliccais sin la survista generala, sa sposta il rectangul u la crusch cotschna en quel lieu, nua che Vus avais cliccà e la charta principala vegn modifitgada correspundentamain.
Centrar sin coordinatas (tschertga geografica)
- Sche Vus enconuschais las coordinatas d'in punct interessant, las stuais Vus mo scriver en il champ ch'è previs per quai. La charta vegn alura centrada precis sin quel punct. -En il sistem da coordinatas naziunalas: p.ex. "622383 245309" -sco longhituda/grad da ladezza: p.ex. "46.5 6.0"
Tschertga d'in lieu, d'in NP u d'in num local
- Il menu "Geographische Suche" pussibilitescha l'access direct a nums da lieus e da vischnancas, a numers postals, a designaziuns geograficas (pizs, abitadis, vals, territoris, auas, vias e stabiliments). I ston vegnir inditgads almain quatter bustabs per ch'il program possia far propostas.
Sfegliar en la cronologia da las preschentaziuns
- Cun las funcziuns "enavos" ed "enavant" pudais Vus passar a las differentas preschentaziuns ch'èn vegnidas mussadas durant la visita dal mussader da chartas (viewer).
Turnar al maletg inizial
- Cun il buttun "home" pudais Vus siglir enavos al maletg inizial dal viewer. Il maletg mida a la charta da l'entira Svizra resp. a l'entira unitad da datas.
SELECZIUN & VISUALISAZIUN DA DATAS
Tschertgar datas cun agid da la tschertga en tut il text
- Sut "Suchen" pudais Vus scriver las noziuns da tschertga (p.ex. "palì", "via", "terratrembel" e.u.v.) e tschertgar las descripziuns da tut las geodatas electronicas disponiblas en moda centrala. Sche Vus tschernis in resultat, vegn quel preschentà directamain en il program per mussar chartas. Il medem mument pon vegnir visualisadas maximalmain 5 unitads da datas.
Tschertgar datas sur in index
- Sut "Katalog" chattais Vus in index structurà tenor temas da tut las geodatas digitalas disponiblas en moda centrala. Sche Vus tschernis unitads da datas, vegnan quellas preschentadas directamain en il program per mussar chartas. Il medem mument pon vegnir visualisadas maximalmain 5 unitads da datas.
Midar il funs da la charta
- Sco funs da la charta stat a disposiziun la charta topografica naziunala en colur u en alv e nair (1). Cun il regulatur orizontal po la charta naziunala vegnir surpostada per part u cumplainamain da la fotografia or da l'aria.
Midar la transparenza da las unitads da datas tschernidas
- La transparenza da las unitads da datas tschernidas po vegnir adattada cun avrir las opziuns (1) e cun spustar il regulatur orizontal (2). Las opziuns pon er vegnir serradas puspè.
Midar la successiun da las unitads da datas tschernidas
- La successiun da las unitads da datas tschernidas po vegnir midada cun activar ils paliets (1).
Stizzar las unitads da datas tschernidas
- Tras la funcziun (1) pon las unitads da datas tschernidas vegnir stizzadas or da la glista sco er or da la visualisaziun sco charta.
Mussar las infurmaziuns supplementaras d'ina unitad da datas
- Per in'unitad da datas pon las suandantas infurmaziuns supplementaras vegnir consultadas sur la tscherna (1), sur la tschertga da datas (2) e sur il catalog (3): sectur da scala valaivel - metadatas - descripziun da detagl - retratga da datas - geoportal tematic - WMS - servetsch - stadi da las datas.
Mussar las infurmaziuns detagliadas d'in element da la charta
- Tar unitads da datas vectorialas (puncts, lingias, poligons) pon ils attributs dals singuls elements da la charta vegnir clamads giu cun in simpel clic da la mieur, premess ch'els èn avant maun. En cas da pliras unitads da datas che giaschan ina sin l'autra vegnan mussads e marcads tut ils elements che sa chattan sut il cursor da la mieur.
RETRAGTA DA DATAS
- Las datas che vegnan mussadas en la fanestra da la charta pon, sche quai è previs da l'uffizi federal respectiv, vegnir retratgas directamain da quel. Sur in buttun d'infurmaziun "i" (1) vegn averta la fanestra d'infurmaziun tar l'unitad da datas tschernida. Il link a la retratga da datas (2) maina tar il post da retratga correspundent.
STAMPAR
- Questa applicaziun po transfurmar la charta principala e las unitads da datas dal funs sco er ils elements ch'èn necessaris per encleger questas datas (scala e.u.v.) en datotecas da PDF da buna qualitad. Questas datotecas pon alura vegnir arcunadas u stampadas. La funcziun "Drucken" lascha cumparair ina fanestra da dialog, nua ch'i po vegnir tschernì il parameter per crear la datoteca da PDF en il format A4. Quest parameter è la scala da la charta. Il sectur da stampa da la charta vegn marcà cun cotschen e po vegnir spustà cun la mieur. La legenda po vegnir stampada sur il buttun d'infurmaziun da l'unitad da datas correspundenta. Attenziun: Las datotecas da PDF èn grondas, ellas han blers megabytes. Lur transmissiun, en spezial sur lingias che han pauca capacitad, dovra pia bler temp.
COLLIAR CUN IN LINK & INTEGRAZIUN
Access a datas sur l'interfatscha da programmar API
Cun API pudais Vus integrar ina charta interactiva da la Svizra en ina pagina d'internet e posiziunar sin quella charta agens puncts d'interess (POI). La documentaziun da la API chattais Vus qua 
.
Arcunar u trametter per e-mail la preschentaziun actuala da la charta
- Sur la funcziun "Karte einbinden" pudais Vus copiar, arcunar u trametter vinavant en in e-mail las preschentaziuns actualas (unitads da datas, lieu, stgalim dal zoom) sco link (URL).
Arcunar u trametter per e-mail il link ad elements da la charta
- Sche las unitads da datas èn unitads da datas vectorialas (puncts, lingias, poligons) po vegnir generà in link (URL) tar ils attributs d'ina unitad da datas. Sur "Anzeigen der Detailinformationen eines Kartenelementes" vegn inditgada in URL sco ultima unitad d'infurmaziun. Quel po vegnir duvrà directamain u, cun in clic dubel, po vegnir averta ina fanestra nova ch'è centrada sin l'element respectiv. Sur "Karte einbinden" pudais Vus ussa er arcunar u trametter vinavant per e-mail la preschentaziun actuala da la charta.
Clamar si ina charta cun parameters
Cun agid d'ina clamada parametrisada po il mussader da chartas (viewer) vegnir clamà si directamain cun unitads da datas predefinidas, cun la lingua, cun il centrum e cun la scala: api.geo.admin.ch
DUMONDAS TECNICAS E GIURIDICAS
Infurmaziuns tecnicas e sustegn
Specificaziun da la conservaziun da las datas en furma da plattinas: api.geo.admin.ch
Dumondas giuridicas / cundiziuns generalas
Per map.geo.admin.ch valan las cundiziuns generalas tenor http://www.disclaimer.admin.ch
Contact: geo.admin.ch